एमालेका नेता एवं पूर्वमन्त्री गोकुल बास्कोटाको गृहनगर काभ्रेको मण्डन देउपुरमा गठबन्धनका उम्मेदवारहरू विजयी भएका छन् ।मेयरमा एकीकृत समाजवादीका जिल्ला अध्यक्ष टोकबहादुर वाइवा विजयी भएका छन् भने उपमेयरमा नेपाली कांग्रेसले जितेको छ । कांग्रेसका उम्मेदवार विष्णुमणि नेपाल भारी मतान्तरका साथ विजयी भएका हुन् ।
मण्डनदेउपुर पूर्व संचारमन्त्री गोकुल बास्कोटाको गृहनगर हो । उनको वडामा भने एमालेले प्यानलै जितेको भए पनि नगरपालिकामा भने जित्न सकेन । यसअघि एमालेका तर्फबाट जितेका टोकबहादुर वाइबा अहिले एकीकृत समाजवादीका जिल्ला अध्यक्ष छन् । उनै वाइवा फेरि मेयर बनेका हुन् ।
मण्डनदेउपुर नगरपालिको वडा नम्बर १, ४, ५ र ७ मा एमाले विजयी भएको छ । यस्तै २, ३, ६, ९, १०, ११ र १२ मा नेपाली कांग्रेसले जित हात पारेको छ । यस्तै, ८ नम्बरमा भने माओवादी केन्द्रले जितेको छ। यस वडामा ३ जना सदस्य कांग्रेसले जितेको छ भने एक जना माओवादी केन्द्रले जितेको छ।
वडा नम्बर १ मा कांग्रेस ४ मतले पराजित भएको छ । मेयरमा विजयी वाइबाले नौ हजार चार सय ६ मत ल्याउँदा प्रतिस्पर्धी एमालेका विदुर सापकोटाले आठ हजार तीन सय ५१ मत ल्याएका छन् ।
उपमेयरमा विजयी विष्णुमणि नेपालले ११ हजार तीन सय पाँच मत ल्याएका छन् । प्रतिस्पर्धी एमालेकी सरिता ढकालले ६ हजार नौ सय २४ मत ल्याएकी छिन् । यहाँ दुई वडाको गणना बाँकी रहँदै उपमेयरमा विष्णुमणि नेपाल विजयी भइसकेका थिए। गणना हुन बाँकी २ वडाको मत तीन हजार पाँच सय ३१ मात्र थियो । जबकी त्यतिबेला नेपालको मतान्तरनै तीन हजार ६ सय ११ रहेको थियो । मण्डनदेउपुरमा १२ वडा रहेका छन् भने यहाँ २१ हजार नौ सय ३५ मत खसेको थियो ।