काठमाडौं । काठमाडौं महानगरपालिकामा प्रमुख प्रशासकीय अधिकृतलाई कार्यकक्ष प्रवेशमा रोक लगाइएपछि महानगर कार्यालयमा उपमेयर सुनिता डंगोलले बैठक राख्दै कर्मचारी हाजिर हुन आउँदा जुन अवस्था पैदा भयो त्यो दुखद रहेको बताएकी छिन्।
महानगर प्रमुख बालेन शाह उपस्थित नभएपछि उपमेयर डंगोलले हाजिर हुन आएका प्रमुख प्रशासकीय अधिकृत सरोज गुरागाईंलाई राखेर बैठक सुरू गरेकी हुन्। बैठकमा वडाध्यक्षहरू सहभागी छन्।
मेयर बालेनले प्रमुख प्रशासकीय अधिकृतको कार्यकक्षमा ताला लगाइदिएका थिए। बिहीबार प्रमुख प्रशासकीय अधिकृत गुरागाईंलाई वडाध्यक्ष र कर्मचारीहरूले ठेलमठेल गरी कार्यालय प्रवेश गराएका थिए।
कार्यकक्षमा लगाइएको ताला फोड्न खोज्दा महानगर प्रहरीले रोकेको थियो। ताला तोड्ने क्रममा ढोकाको सिसा पनि फुटेको थियो।
प्रमुख प्रशासकीय अधिकृतसहितको छलफलमा उममेयर महानगर प्रमुख बालेन शाहले बैठकमा उपस्थित भएर समाधान खोज्न आग्रह गरेकी छन्। उनले मेयर बालेनलाई चेतावनी दिँदै, कोठमा बसेर निर्देशन नदिन भनेकी छिन्।
‘मन्त्रालयबाट पठाएपछि प्रमुख प्रशासकीय अघिकृत हाजिर गर्न आउनु भएको छ,’ उपमेयर डंगोलले भनिन्, ‘उहाँ हाजिर गर्न आउँदा यो झडपको अवस्था हुनु राम्रो कुरा होइन । कर्मचारी–कर्मचारीबिच लडाइ हुनु पनि राम्रो होइन।’
