चितवन । चितवनको खैरहनी नगरपालिका-१२ चिसाहानीका हरि अर्यालले १३ वर्षअघि माछापालन सुरु गरेका थिए। साथीभाइले माछापालन गरेको देखेर उनले पाँच कठ्ठा जमिनमा पोखरी खनेर माछापालन सुरु गरेका हुन्।
सुरुआती कठिनाइका बाबजुद, अर्यालले माछापालनलाई व्यावसायिक रुपमा विस्तार गरे। पछि राम्रो हुँदै गएपछि २०७३ सालमा चार बिघा जमिन थपेर ६ प्रजातिका माछापालन गर्न थाले। अहिले चार बिघा जमिनको जलासयमा माछा छन्। उनले वार्षिक एक करोड ५० लाख रुपैयाँको माछा बिक्री गर्दा खर्च कटाएर ७० लाख बढी नाफा हुने गरेको अर्यालले बताए।
‘वार्षिक ६० लाख जति दानामा खर्च हुन्छ, विद्युत् लगायतका अन्य क्षेत्रमा खर्च हुन्छ। वार्षिक ७० लाख त कम्तीमा बचत हुन्छ’ उनले भने। नहाँको फर्ममा वार्षिक दुई सय टनभन्दा बढी माछा उत्पादन हुन्छन्। यतिखेर १० टन माछा बजार लैजाने तयारी छ। अर्यालले माछापालनमा आधुनिक प्रविधिको प्रयोग गर्दै उत्पादन र बिक्रीमा ध्यान दिएका छन्।
उनले उत्पादन गरेका माछा चितवनसहित काठमाडौं, पोखरा, बुटवललगायत सहरमा बिक्रीका लागि लैजाने गरिन्छ। आफ्नो आम्दानीबाट थप जमिन किनेर, घर बनाएका छन् भने गाडी किन्ने योजना बनाएको उनले सुनाए। माछापालन व्यवसायबाट नै अर्यालले तीन छोराछोरीलाई चितवनको प्रतिष्ठित बोर्डिङ स्कुलमा पढाइरहेका छन्।
उनले आफ्नो फर्ममा ६ जनालाई रोजगारी दिएका छन्। आगामी दिनमा माछापालन व्यवसायलाई एग्रो टुरिजममा विस्तार गर्ने योजना रहेको उनले बताए। ‘पोल्ट्री क्षेत्रमा हात हालेको थिए, त्यसबाट राम्रो आम्दानी हुन सकेन’ अर्यालले भने, ‘यतिबेला कागती खेतीमा पनि लगानी गरेको छु, यसलाई एग्रो टुरिजममा लैजाने योजना छ।’
श्रीमान्श्री-मती नै माछापालनमा खटिन्छन्। माछापालनमा रुची राख्ने अन्य कृषकलाई प्रशिक्षण र सल्लाह प्रदान गर्दै आएका छन्। ४५ वर्षीय अर्याल माछापालनमा त्यतिकै लागेका होइनन्। पैसा कमाउन सन् २००५ मा मलेसिया पुगेका उनी २४ महिना त्यहाँ बसे। त्यतिखेर नेपालमै केही गर्ने सोचका साथ राम्रै पैसा कमाएर स्वदेश फर्किए।
तर, यहाँ भने जस्तो नभएपछि फेरि सन् २००८ मा फेरि युनाइटेड अरब इमिरेट्स ९युएई० को दुबई गए। दुई वर्ष दुबई बसेर फर्किनुभएका अर्याल परम्परागत खेतीपाती मै लागेका थियो। पछि भरतपुरको बजार क्षेत्रमा माछापालन गरेको देखेपछि उनले पनि सुरु गरेका हुन्। माछापालन गर्दा सुरुवाती दिनमा धेरै दुःख पाएको अर्यालसँग अनुभव छ।
‘एक कठ्ठामा माछा कति राख्ने, कसरी राख्ने केही ज्ञान थिएन, अन्धाधुन्ध नै माछापालन गर्न थालियो’ उनले भने, ‘सुरुमा व्यापारीले ठगे। दुई तीन वर्ष घाटा नै भयो।’ पछि माछापालनसम्बन्धी बुझ्दै गएपछि सहज भएको उनको भनाइ छ। सुरुआती दिनमा अर्यालले बंगलादेशबाट माछाका भुरा ल्याएर व्यवसाय सुरु गरेका हुन्।
त्यतिखेर भारतिय बाटो हुँदै लुकाइछिपाइ गरेर भुरा ल्याउनुपर्ने बाध्यता रहेको उनले सुनाए। अहिले भने चितवनमै सरकारीस्तरबाट माछाका भुरा उत्पादन हुँदा माछापालन गर्न सहज भएको छ। अर्याल पछिल्लो अधिकांश किसानका लागि प्रेणाका स्रोत बनिरहेका छन्। माछापोखरीमा आर्यालले दुई करोड लगानी गरेरका छन्। उनका सात वटा पोखरीमा माछा छन्।
सुरुमा पोखरी खन्दा नै एक करोड रुपैयाँ खर्च लागेको थियो। जग्गा भाडामा लिएर माछापालन गरेका अर्यालको २८ कठ्ठा जमिन आफ्नै हो। अहिले चितवनमा १५ सयभन्दा बढी किसान माछापालनमा लागेका छन्। नेपालमा माछापालनमा राम्रो सम्भावना रहेको उनको भनाइ छ। ‘विदेश जानुभन्दा, यहाँ नै उत्पादनमूलक काम गरेर राम्रो आम्दानी गर्न सकिन्छ’ उनले भने।
राज्यले दाना र बिजुलीमा छुट दिएमा नेपाली माछापालन किसान अगाडि बढ्न सक्ने उनले बताए। ‘माछापालनमा राम्रो आम्दानी छ तर राज्यले हेर्ने नजर गलत छ’ अर्यालले भन्छन्, ‘देश धनी बनाउने हो भने युवालाई रोकेर कृषिमा लगानी गर्न जरुरी छ।’ भारतबाट अवैध रुपमा माछाको आयात नरोकिदा नेपाली किसान मारमा पर्दै आएको अर्यालको भनाइ छ।
भारतका माछालाई व्यवस्थापन गर्न सके नेपालमा उत्पादन भएका माछाले सहजै बजार पाउँछन्। राज्यले ठोस योजना बनाएर अवैध कारोबार रोक्नु पर्ने उनको भनाइ छ। माछा व्यवसायी संघ चितवनका उपाध्यक्षसमेत रहेका उनी अर्यालले संघकै नेतृत्वमा अवैध माछा नियन्त्रण गरेर नष्ट गर्ने अभियान चलाए पनि सार्थकता पाउन नसकेको बताउँछन्। रासस
