काठमाडौं। चालू आर्थिक वर्षको दुई महिनामा वीरगञ्ज नाकाबाट १७ अर्ब रुपैयाँबराबरका वस्तु तथा सामान विदेशी मुलुकमा निर्यात भएको छ।
गत वर्षको सोही अवधिको तुलनामा चालू आर्थिक वर्षको दुई महिनामा १० अर्ब ९८ करोड रुपैयाँभन्दा बढीको वस्तु तथा सामान निर्यात भएको हो।
गत आर्थिक वर्षको पहिलो दुई महिनामा यस नाकाबाट छ अर्ब पाँच करोड रुपैयाँ बराबरको वस्तु तथा सामान निर्यात भएको थियो।
वीरगञ्ज भन्सार कार्यालयका प्रमुख भन्सार प्रशासक विष्णुप्रसाद ज्ञवालीले वीरगञ्ज नाका हुँदै चालु आवको दुई महिनामा निर्यात उत्साहजनक भएको बताए।
“गत आवको दुई महिनाको तुलनामा चालु आवको सोही अवधिमा यहाँबाट हुने निर्यात १८१ प्रतिशतले वृद्धि भएको छ”, उनले भने, “गत आवको दुई महिनामा यहाँबाट हुने वैदेशिक व्यापारको अनुपात १ः२० रहेको अहिले सो अनुपातमा सुधार भएर १ः६० मा पुगेको छ।”
वीरगञ्ज नाका हुँदै चालु आवको दुई महिनामा आठ अर्ब ८४ करोड रुपैयाँ बराबरको चार करोड २८ लाख २४ हजार ८७१ लिटर भटमासको तेल निर्यात भएको छ। जबकी गत आवको सोही अवधिमा भने तीन लाख मूल्य पर्ने ४८० लिटर भटमासको तेल प्रशोधित निर्यात भएको थियो।
त्यस्तै दुई महिनामा एक अर्ब २४ करोड रुपैयाँ पर्ने एक करोड २६ लाख ९५ हजार ७३२ लिटर फलफूलको जुस विदेशी मुलुकमा निर्यात भएको छ। जबकी गत आवको सोही अवधिमा भने एक अर्ब २९ करोड रुपैयाँबराबरको एक करोड ३६ लाख ४८ हजार १५५ लिटर जुस निर्यात भएको थियो।
चालू आवको दुई महिनामा एक अर्ब १७ करोड मूल्य बराबरको तीन करोड ४१ लाख १३ हजार २३० लिटर सूर्यमुखीको प्रशोधित तेल निर्यात भएको छ। जबकी गत आवको सोही अवधिमा भने नगन्य मात्रामा मात्रै निर्यात भएको थियो।
