काठमाडौं । नेकपा एमालेले सरकारलाई गिरिबन्धु टी–स्टेटको फाइल खोल्न चुनौती दिएको छ ।
सोमवार प्रतिनिधि सभाको बैठकमा बोल्दै नेकपा एमालेकी उपनेता पद्या अर्यालले विवादित भनिएका सबै फाइल खोल्न सरकारलाई चुनौती दिएकी हून् ।
उनले बजेटको छलफलका क्रममा अर्थमन्त्री डा स्वर्णिम वाग्लेले विपक्षीलाई लक्षित गर्दै ‘फाइल खोल्ने’ चेतावनी दिएको आरोप लगाउँदै उनले टी–स्टेट प्रकरणको फाइल पहिलो प्राथमिकता राखेर खोल्न चुनौती दिइन् ।
उनले विपक्षीसँग जोडिएका भनिएका ओम्नी, वाइडबडीलगायतका सबै प्रकरणको छानबिन गर्न पनि आग्रह गरिन् । उनले विपक्षीमाथी लगाइएका आरोपहरू छानबिनबाट पुष्टि नभएमा आरोप लगाउनेहरूले त्यसको जिम्मेवारी लिन तयार छन् कि छैनन् ? भन्दै उनले प्रश्न गरिन्। सरकारको जिम्मेवारीमा रहेका व्यक्तिले संसदमा विपक्षीलाई धम्क्याउने शैली अपनाएको भन्दै अर्यालले त्यसलाई खेदजनक भएको बताइन् ।
उनले भनिन्, ‘प्रतिपक्षीले बजेटका सम्बन्धमा राखेका सल्लाह, सुझाव प्रश्न गर्दैगर्दा अर्थमन्त्रीजीले जवाफ दिने क्रममा जे चीज बताउनुभयो, त्यो आपत्तीजनक छ । कसलाई लक्षित गर्नुभयो ? उहाँले फाईल खोल्ने धम्की दिनुभएको छ, म भन्न चाहन्छु, टी स्टेटको फाईल पहिलो नम्बरमा खोलियोस्, म आग्रह गर्न चाहन्छु, त्यसपछि विपक्षीसंग जोडिएका ओम्नी हुन् की वाईडवढी हुन की के के फाईल हुन, तपाईहरुको हातमा छ, सरकारलाई भन्न चाहन्छु, यो सदनमार्फत ती खोलियोस् । साँचो कुरा के हो ? त्यो बाहिर ल्याईयोस् । यद्यपी आज लगाईरहेका आरोपहरु सावित भएनन् भने, छानविनले सत्य ठहरिएनने भने मान्छेमा स्वाभिमानमाथी आँच आउने, गम्भिर आरोपहरु लगाउने अनि त्यसको जिम्मेवारी लिएर कठघरामा उभिने आँट उहाँले गर्नुहुन्छ, कि गर्नुहुन्न ?’
