काठमाडौं। हाल देशभर मनसुनी वायुको प्रभाव रहेकाले विभिन्न स्थानमा वर्षा र मौसम बदलीको सम्भावना रहेको जल तथा मौसम विज्ञान विभाग, मौसम पूर्वानुमान महाशाखाले जनाएको छ। महाशाखाका अनुसार मनसुनको न्यूनचापीय रेखा हाल सरदर स्थानमै अवस्थित रहेको छ।
यतिबेला गण्डकी, लुम्बिनी, कर्णाली र सुदूरपश्चिम प्रदेशका साथै कोशी र बागमती प्रदेशको पहाडी तथा हिमाली भू(भागमा साधारणतया बदली रहेको छ भने मधेस र कोशी प्रदेशका तराई भू(भागमा आंशिक बदली छ।
देशका हिमाली र पहाडी भू(भागका केही स्थानमा मेघगर्जन र चट्याङसहित मध्यम वर्षा तथा हिमपातको सम्भावना रहेको छ। यसैगरी कोशी, बागमती, गण्डकी र लुम्बिनी प्रदेशका तराईका केही स्थान तथा मधेस र सुदूरपश्चिम प्रदेशका तराईका थोरै स्थानमा पनि मेघगर्जन र चट्याङसहित मध्यम वर्षाको सम्भावना औँल्याइएको छ।
विशेष गरी कोशी, बागमती, गण्डकी, लुम्बिनी र कर्णाली प्रदेशका पहाडी भू(भागका एक(दुई स्थानमा भारी वर्षाको सम्भावना रहेको महाशाखाले जनाएको छ।
आज राति पनि देशका पहाडी भू(भागका केही र तराईका थोरै स्थानका साथै हिमाली भू(भागका थोरै स्थानमा वर्षा तथा हिमपात जारी रहनेछ। रातिको समयमा बागमती र गण्डकी प्रदेशका पहाडी तथा तराई भू(भागका एक(दुई स्थानमा भारी वर्षा हुनसक्ने अनुमान गरिएको छ।
भारी वर्षाको सम्भावना रहेका क्षेत्रहरूमा गेग्रान बहाव, बाढी, पहिरो तथा भूक्षय जस्ता प्राकृतिक प्रकोपको जोखिम उच्च रहने भएकाले आवश्यक सतर्कता अपनाउन महाशाखाले अनुरोध गरेको छ।
वर्षाका कारण दैनिक जनजीवनका साथै कृषि, स्वास्थ्य, पर्यटन, पर्वतारोहण, सडक तथा हवाई यातायात समेत प्रभावित हुनसक्ने भएकाले सर्वसाधारण र सरोकारवाला निकायलाई विभागको पछिल्लो सूचनामा अद्यावधिक रहन आग्रह गरिएको छ।
