काठमाडौं । सरकारले विटौरी जग्गामा बसोवास गर्दै आएका नागरिकहरूको हक सुरक्षित गर्न समिति गठन गर्ने निर्णय गरेको छ ।
शुक्रवार सिंहदरबारमा बसेको बैठकले यस्तो निर्णय गरेको हो ।
सूचना तथा सञ्चारमन्त्री डा। विक्रम तिमिल्सिनाकाअनुसार सरकारले लामो समयदेखि विटौरी जग्गामा बसोवास गर्दै आएका व्यक्तिहरूको नाममा जग्गा दर्ता गर्ने प्रक्रियालाई सहज बनाउन ‘विटौरी जग्गामा बसोवास गरी आएका व्यक्तिहरूको नाममा जग्गा दर्ता गर्ने सम्बन्धी समिति गठन आदेश, २०८३’ स्वीकृत गरेको छ ।
आर्थिक क्षेत्रतर्फ सरकारले नेपालको भूकम्पीय जोखिम व्यवस्थापनका लागि विश्व बैंकसँग सम्झौता अघि बढाउने निर्णय गरेको छ। जसअनुसार मन्त्रिपरिषद्ले ‘नेपाल अर्थक्वेक क्याटास्ट्रोफ वन’ सम्बन्धी म्यान्डेट एग्रीमेन्टमा हस्ताक्षर गर्न अर्थ मन्त्रालयलाई स्वीकृति प्रदान गरेको छ।
यस्तै, खेलकुद क्षेत्रको प्रोत्साहनका लागि सरकारले जापानको आइची(नागोयामा सम्पन्न २०औँ एसियाली खेलकुदमा पदक प्राप्त गर्ने महिला कबड्डी र कराते खेलका खेलाडी, प्रशिक्षक तथा व्यवस्थापकहरूलाई नगद पुरस्कार प्रदान गर्ने निर्णय गरेको छ। यस निर्णयले राष्ट्रिय गौरव बढाउने खेलाडीहरूको मनोबल उच्च राख्ने अपेक्षा सरकारले लिएको छ।
प्रशासनिक क्षेत्रतर्फ नेपाल न्याय सेवा, सरकारी वकिल समूहका सहन्यायाधिवक्ता अच्युतमणि न्यौपानेलाई राजपत्राङ्कित विशिष्ट श्रेणीमा बढुवा गरिएको छ। बढुवासँगै उनलाई बेपत्ता पारिएका व्यक्तिको छानबिन आयोगको सचिव पदमा पदस्थापन गर्ने निर्णयसमेत मन्त्रिपरिषद्ले गरेको छ।
