काठमाडौं मंसिर, २७–
ग्रेटर नेपालका अभियन्ता फणीन्द्र नेपाललाई जिल्ला प्रशासन कार्यालय, काठमाडौंले १ हजार जरिवाना गराउने फैसला गरेको छ ।
भारतीय प्रधानमन्त्री नरेन्द्र मोदी बिमस्टेक सम्मेलनमा भाग लिन नेपाल आएका बेला गत भदौ १४ गते उनलाई पक्राउ गरेर ६ दिनसम्म हिरासतमा राखिएको थियो ।
नेपालले मोदीलाई एयरपोर्टमा कालो झण्डा देखाउने तयारी गरेपछि उनलाई चाबहिलस्थित निवास नजिकैबाट पक्राउ गरिएको थियो । पछि उनी एक हजार धरौटीमा छुटेका थिए ।
सोही घटनामा अहिले काठमाडौंका प्रमुख जिल्ला अधिकारी रामप्रसाद आचार्यको एकल इजलासले एक हजार जरिवाना गर्ने फैसला गरेको हो । नेपालले ‘सार्वजनिक स्थानमा मुलुकी अपराध संहिता ऐन बमोजिम कसुर गरेको’ ठहर इजलासको छ ।
नेपालले आफूमाथिको जरीवाना हाँस्यास्पद र निर्लज्जतापूर्ण भएको प्रतिक्रिया दिएका छन् । यो फैसलाविरुद्ध अदालत जाने पनि बताएका छन् ।
