काठमाडौं पुस, ३–
सत्तारुढ नेपाल कम्युनिष्ट पार्टी (नेकपा) को स्थायी समिति बैठक स्थगित भएको छ । प्रधानमन्त्री एवं पार्टी अध्यक्ष केपी शर्मा ओलीको व्यस्तताका कारण बुधबारसम्मका लागि बैठक स्थगित गरिएको नेकपाले जनाएको छ । भोलि बिहान ८ बजे पुनः पार्टी केन्द्रीय कार्यालय धुम्बाराहीमा बस्ने बैठक मंगलबार ३ घण्टा पनि नबस्दै स्थिगित भएको हो ।
मंगलबार बिहान साढे ८ बजे सुरु भएको बैठक ११ः१० सम्म बसेको थियो । मंगलबारको बैठकमा स्थायी समिति सदस्यहरु केशब बडाल, टोपबहादुर रायमाझी, भीम बहादुर रावल, योगेश भट्टराई, शंकर पोख्रेल, सत्यनारायण मण्डल, सोमनाथ अधिकारी, पृथ्वीसुब्बा गुरुङ लगायतले धारणा राखेको महसाचिव विष्णु पौडेलले जानकारी दिए । उनीहरुले अध्यक्षद्वय ओली र पुष्पकमल दाहाल प्रचण्डले पेश गरेको राजनीतिक प्रतिवेदनमा आफ्ना धारणाहरु राखेका थिए । नेताहरुले पार्टी नेतृत्व र सरकारको काम गराईप्रति आलोचना गरेका छन् ।
हिजोको बैठकमा धारणा राख्ने सदस्यहरुले पनि नेतृत्व र सरकारको खरो आलोचना गरेका थिए । फरक प्रतिवेदन पेश गरेका वामदेव गौतम नेतृत्वप्रति निकै आक्रामक बने । उनले संविधान संशोधन गरेर भएपनि दुई जना प्रधानमन्त्री हुने व्यवस्था गर्न अध्यक्ष ओलीलाई चुनौती दिए ।
आफूले पेश गरेको प्रतिवेदनमा एक व्यक्ति, एक पदको व्यवस्था हुनुपर्ने माग गरेका उनले सरकारको नेतृत्व ओलीले र पार्टीको नेतृत्व प्रचण्डले गर्नुपर्ने बताएका थिए । त्यसको भोलिपल्ट भएको एउटा कार्यक्रममा अध्यक्ष ओलीले ‘संविधानमा व्यवस्था नभएर मात्रै हो नत्र दुवै जना प्रधानमन्त्री हुन्थ्यौँ’ भनेर जवाफ दिएका थिए ।
ओलीले जवाफले आफूलाई अपमानित गरेको भन्दै गौतमले बैठकमा ‘तपाईसँग दुई तिहाई बहुमत छ, संविधान संशोधन गरेर दुई जना प्रधानमन्त्री हुने व्यवस्था मिलाउनुहोस्’ भन्ने चुनौती दिएका थिए । यस्तै अर्का नेता घनश्याम भुसालले पनि आफूलाई कारवाही गरेर देखाउन चुनौती दिए । पार्टी अध्यक्ष ओलीले नै गुटबन्दी चलाएको दाबी गर्दै उनले आफूलाई फरक गुटको भएकै कारण कुन विधान अनुसार कारवाही गर्न मिल्छ, गुर्नस् भनेर चुनौती दिएका थिए ।
पछिल्लो समय नेकपाभित्रको असन्तुष्टि सतहमा आएको छ । गएको जेठ ३ गते तत्कालीन एमाले र माओवादी केन्द्रबीच एकता भएपछि पहिलो पटक स्थायी समितिको बैठक बसेको हो । सदस्यहरुले बोल्ने क्रम सकिएपछि अध्यक्षले जवाफ दिने कार्यक्रम रहेको छ ।