काठमाडौं पुस, २६–
भारत भ्रमणमा रहेका परराष्ट्रमन्त्री प्रदीपकुमार ज्ञवाली र उनका भारतीय समकक्षी सुष्मा स्वराजबीच भेटवार्ता भएको छ । बिहीबार नयाँ दिल्लीमा रहेको भारतीय विदेश मन्त्रालयमा उनीहरुबीच भेटवार्ता भएको हो । परराष्ट्र मन्त्रालयले नेपाल भारतको सम्बन्धको विभिन्न विषयमा छलफल हुनुका साथै द्वीपक्षीय सहयोगमा सञ्चालित परियोजनाको प्रगतिको समीक्षा भएको जनाएको छ ।
उनीहरुले हालै भएका उच्च स्तरीय भ्रमणको स्मरण गर्दै ती भ्रमणले वर्षौदेखिको समानता, आपसी समझदारी, एक अर्काको सम्मान र द्वीपक्षीय हितका आधारमा सञ्चालित सम्बन्ध सुदृढ बनाउन योगदान पुगेको बताएका थिए ।
नेपाली परराष्ट्रमन्त्रीको सम्मानमा भारतीय विदेशमन्त्री स्वराजले दिवाभोज दिएकी छन् । परराष्ट्रमन्त्री ज्ञवाली बिहीबार विहान भारतको नयाँ दिल्ली पुगेका हुन् । उनी चौथो राइसिना डायलगमा भाग लिन गएका हुन् ।