काठमाडौं वैशाख, २७–
सुन्धारास्थित केन्द्रीय कारागारमा कैद सजाय भुक्तान गरिरहेका अभियुक्तले नै निर्माण व्यवसायीलाई ज्यान मार्ने धम्की दिएको प्रहरीको प्रारम्भिक अनुसन्धानबाट खुलेको छ । नयाँ पत्रिका दैनिकले समाचार छापेको छ ।
रमेश बाहुन भनिने सुजन पौडेल, समीरमानसिंह बस्नेत र रिगल भनिने योग ढकालले फोन गरेर व्यवसायीलाई ज्यान मार्ने धम्की दिएको खुलेको महानगरीय अपराध अनुसन्धान महाशाखाले जनाएको छ ।
व्यवसायीलाई अज्ञात नम्बरबाट निरन्तर धम्की आएपछि केही साताअघि नेपाल निर्माण व्यवसायी महासंघले पत्रकार सम्मेलन गरेर सरकारको ध्यानाकर्षण गराएको थियो ।
रमेश लागुऔषध कारोबार अभियोग तथा समीरमान र रिगल हत्या अभियोगमा कैद सजाय भोगिरहेका छन् । समीरमानलाई निर्माण व्यवसायी शरद गौचन हत्याको अभियोग पनि लागेको छ । प्रहरीले गौचन हत्यामै संलग्नमध्ये फरार दुई अभियुक्त पनि निर्माण व्यवसायीलाई धम्क्याउने धन्दामा लागेको जनाएको छ ।
‘निर्माण व्यवसायीलाई ज्यान मार्ने धम्की आएको सम्बन्धमा अनुसन्धान भइरहेको छ । अनुसन्धान रमेश बाहुन भनिने सुजन पौडेल, समीरमानसिंह बस्नेत र रिगल भनिने योग ढकालमाथि केन्द्रित हुनु स्वाभाविक हो,’ महाशाखा प्रमुख एसएसपी धीरजप्रताप सिंहले भने, ‘यीबाहेक व्यक्तिमाथि पनि अनुसन्धान भइरहेको छ । उनीहरूको संलग्नताको केही आधार फेला परेका छन् ।’
पक्राउ परेपछि तीनैजनालाई केन्द्रीय कारागारस्थित गोलघरमा राखिएको थियो । उनीहरूले इन्टरनेट फोन प्रयोग गरेर धम्की दिएको भेटिएको प्रहरीले जनाएको छ । कतिपय अवस्थामा कारागारमा उपलब्ध सुविधाको टोलिफोन पनि पनि प्रयोग गरेको देखिएको प्रहरीले जनायो ।
गोलघरभित्रै मिलेर व्यवसायीलाई धम्की दिएको खुलेपछि रमेश, समीरमान र रिगललाई गोलघरबाट अलग्याइएको छ । गृह मन्त्रालयको आदेशपछि रिगललाई कारागार व्यवस्थापन विभागले मकवानपुरस्थित भीमफेदी कारागारमा स्थानान्तरण गरिसकेको प्रहरीले जनायो ।
यस्तै, रमेश र समीरमानलाई गोलघरबाट निकालेर केन्द्रीय कारागारकै फरक–फरक खोरमा राखिएको छ । अबको केही दिनमै उनीहरूलाई पनि अन्य कारागार सारिने प्रहरीको भनाइ छ ।
‘कारागार स्थानान्तरणका लागि सिफारिस भएको हो । कारागार सार्ने कि नसार्ने भन्ने विषयमा के निर्णय भयो थाहा भएन । तर, घटना सम्बन्धमा प्रहरीको अनुसन्धान भने जारी छ,’ महाशाखा प्रमुख एसएसपी सिंहले भने ।
