सोलुखुम्बमा विप्लव समूहको प्रहरी चौकी कब्जा गर्ने प्रयास



सोलुखुम्बु जेठ, २०–

विप्लव नेतृत्वको नेपाल कम्युनिष्ट पार्टी नेकपाले जनयुद्धकै शैलीमा प्रहरी चौकी आक्रमणको प्रयास गरेको छ ।  ‘विप्लव’ नेकपाले सोलुखुम्बुस्थित एक प्रहरी चौकी कब्जाको प्रयास गरेको हो । आइतबार राति विप्लव नेकपाले  महाकुलुङ गाउँपालिका–३ छेस्कामस्थित प्रहरी चौकी कब्जा गर्ने प्रयास  गरेको तर, प्रयास असफल भएको बतार्यएको छ । मध्यराति १२ बजेतिर २५–३० जनाको विप्लव माओवादीका कार्यकर्ता चौकी पुगेको भए पनि त्यसअघि नै त्यहाँ कार्यरत प्रहरी हतियारसहित बाहिरीसकेकाले चौकी कब्जाको रणनीति असफल भएको प्रहरी स्रोतले  जनाएको छ । 

माओवादी कार्यकर्ता कब्जाको लागि आउँदै गरेको सूचना पाएपछि चौकीमा कार्यरत ७ जना प्रहरी हतियारसहित सुरक्षित स्थानमा गएको जनाइएको छ । प्रहरी र माओवादी कार्यकर्ताबीच भेट नभए पनि राति १२ बजेदेखि विप्लव कार्यकर्ता विहान ३ बजेसम्म चौकी क्षेत्रमै रहेको जनाइएको छ ।

 

महाकुलुङ क्षेत्रमा केही दिनदेखि विद्युत नभएका कारण नेपाल टेलिकमद्वारा वितरित सञ्चार सेवा अबरुद्ध भएको मौका छोपेर कब्जाको प्रयास गरिएको अनुमान गरिएको छ । यता जिल्ला प्रशसन कार्यालयमा सुरक्षा समितिको वैठक बसिरहेको प्रमुख जिल्ला अधिकारी नरेन्द्र रानामगरले जानकारी दिएका छन् ।

 

उनले यसबारे अहिले नै केहि कुरा भन्न नसकिने बताएका छन् । प्रदेश र जिल्लाबाट नेपाली सेना र प्रहरीको टोली सो क्षेत्रमा हेलिकप्टरमार्फत पुगिसकेका छन् । छेस्काम सदरमुकाम सल्लेरीदेखि करीब २५ कोषको दूरीमा पर्छ ।

प्रकाशित मिति : २० जेष्ठ २०७६, सोमबार  ८ : ०१ बजे