उदयपुर ।
लिम्चुबुङ गाउँपालिकामा सुनकोसी नदीले बगाएर दुई जना वेपत्ता भएका छन् । बुधबार बिहान सुनकोसीमा माछा मार्ने क्रममा ज्यामिरे पुगेका उनीहरुलाई नदीले बगाएको हो । वेपत्ता हुनेमा सोही गाउँपालिका १ बास्बोटेका १६ वर्षीय देवकुमार राई र १४ वर्षीय प्रविण राई बेपता भएका हुन्।
वेपत्ता भएकाको खोजी जारी राखिएको स्थानीय तथा गाउँपालिकाका उपाध्यक्ष रमिला राईले जानकारी दिएकी छन् । देवकुमार माध्यमिक विद्यालय बुतकुबाट यसै वर्ष एसईई परीक्षा दिएका हुन् भने प्रविण सोही विद्यालयमा कक्षा ९ का विद्यार्थी हुन्। प्रहरीले भने यस घटनाबारे कुनै जानकारी नआएको बताएको छ। जिल्ला प्रहरी कार्यालय उदयपुरका प्रहरी प्रमुख एसपी वीरबहादुर बुढामगरले आफूले पनि हल्ला मात्रै सुनेको र घटनाबारे बुझ्न इलाका प्रहरी कार्यालय लिम्चुङ्गबुङ्गलाई आदेश दिएको बताए।
घटनास्थल र इलाका प्रहरी कार्यालय झन्डैं दुई घण्टाको दूरीमा पर्छ। गाउँपालिकाका वडा सदस्य गुरुमणि कुमाईले टेलिफोन समस्याका कारण प्रहरीलाई जानकारी गराउन कठिनाई भएको बताए।