राष्ट्रपति विद्यादेवी भण्डारीले कायम मुकायम प्रधानसेनापतिमा रथी प्रभुराम शर्मालाई नियुक्त गरेकी छन् । प्रधानसेनापति महारथी पूर्णचन्द्र थापा अनिवार्य अवकाशमा जाने भएकाले राष्ट्रपतिले शर्मालाई कायम मुकायम प्रधानसेनापति तोकेको राष्ट्रपति कार्यालयका प्रवक्ता जगन्नाथ पन्तले जानकारी दिएका छन् ।
नेपाली सेनाका प्रधानसेनापति महारथी थापाको ३ वर्षे पदावधि भदौ २४ गतेबाट सकिँदैछ ।
प्रधानसेनापति थापा साउन २५ देखि घर बिदामा बस्ने भएकाले ज्येष्ठताका क्रममा रथी प्रभुराम शर्मालाई सैनिक ऐन, २०६३ को दफा ८ को उपदफा ९३० अनुसार नेपाल सरकार, मन्त्रिपरिषद्को साउन १२ गतेको निर्णयबाट सिफारिस भएका थिए । सोही बमोजिम राष्ट्रपतिले शर्मालाई साउन २६ गतेबाट लागू हुने गरी कायम मुकायम प्रधानसेनापतिमा तोकेको राष्ट्रपति कार्यालयले जनाएको छ ।
