नेपाली काँग्रेसले भदौ १८ गते गाउँ तथा नगरपालिकाको वडा अधिवेशन सुरु गरेर पार्टीको १४औँ महाधिवेशन औपचारिक प्रक्रिया प्रारम्भ गर्ने भएको छ ।
पार्टीको सबैभन्दा तल्लो र औपचारिक निकाय वडा अधिवेशनको प्रारम्भ गरेर महाधिवेशनको शुभारम्भ गरिने भएको हो । पार्टीको केन्द्रीय निर्वाचन समितिले अब महाधिवेशनको प्रक्रिया सुरु हुने उल्लेख गर्दै निर्वाचन पर सर्ने या अन्य कुनै पनि खालको द्विविधा नरहेको स्पष्ट गरेको छ ।
निर्वाचन समितिका संयोजक महादेव यादवले अब कुनै खालको समस्या नरहेकाले महाधिवेशनको प्रक्रिया सहज रूपमा अघि बढ्ने जानकारी दिनुभयो ।
पार्टीले अहिलेसम्म ५६ जिल्लाका क्रियाशील सदस्यताको विवाद समाधान गरी ५३ जिल्लामा जिल्ला निर्वाचन अधिकृत खटाइसकेको छ ।
बुधबार सुनसरी, मकवानपुर र बागलुङ जिल्लाका लागि निर्वाचन अधिकृत खटाउँदै छ ।
जिल्लामा पुगेका निर्वाचन अधिकृतले पार्टीसित समन्वय गरेर वडा अधिवेशन प्रक्रिया सुरु गरिसकेको जानकारी निर्वाचन समितिका संयोजक यादवले दिनुभयो । जिल्ला निर्वाचन अधिकृतलाई सम्भव भएसम्म छिटो साधनद्वारा जिल्लामा पठाइएको छ ।
क्रियाशील सदस्यताको सूची र निर्वाचनसँग सम्बद्ध सामग्रीसहित जिल्ला निर्वाचन अधिकृत जिल्लामा पुगेको जनाइएको छ ।
काँग्रेसको निर्वाचन समितिले वडास्तरको अधिवेशन १८ गते सम्पन्न हुन बाँकी रहेको अवस्थामा दुई चार दिन पर सारेर पनि निर्वाचन गराइने जनाएको छ ।
पार्टीको निर्वाचन समितिका संयोजक यादवले केन्द्रीय निर्वाचन समितिलाई जानकारी गराएर जिल्ला निर्वाचन अधिकृतले भदौ १८ गतेपछि पनि वडा स्तरको अधिवेशन सम्पन्न गर्ने जानकारी दिनुभयो ।
केन्द्रीय निर्वाचन समितिले गाउँपालिका तथा नगरपालिका स्तरको अधिवेशन हुनुअघि वडाको अधिवेशन सम्पन्न गर्न निर्देशन गरेको हो । निर्वाचन समितिका संयोजक यादवले भदौ २७ गते अघि नै सबै वडाको अधिवेशन पूरा गरिने जानकारी दिनुभयो ।
भदौ २७ गते पार्टीको नगर गाउँस्तरको अधिवेशन गर्ने काँग्रेसको पूर्वनिर्धारित कार्यतालिका छ ।
पार्टीको नगर तथा गाउँपालिका स्तरको अधिवेशनमा वडाबाट निर्वाचित भएका क्षेत्रीय प्रतिनिधि र पार्टीको वडाध्यक्ष मतदाता हुने भएकाले पनि गाउँ तथा नगरको अधिवेशन अगावै वडास्तरको अधिवेशन सम्पन्न गर्नुपर्ने भएको समाचार गोरखापत्र दैनिकमा प्रकाशित छ ।
