प्रसिद्ध भारतिय गायिका लता मंगेशकरको निधन भएको छ । आइतबार मुम्बईको एक अस्पतालमा ९२ वर्षको उमेरमा उनको निधन भएको हो ।
यसै वर्ष जनवरीको सुरुवातमा कोभिड–१९ संक्रमण भएपछि उनलाई अस्पतालमा भर्ना गरिएको थियो । स्वास्थ्य अवस्थामा सुधार नहुँदा उनी आईसीयूमा उपचाररत थिइन् ।
लता मंगेशकर एक महान् पार्श्वगायिका थिइन् । भारतरत्नबाट सम्मानित उनले बलिउडमा करियरको सुरुवात सन् १९४२ बाट गरेकी थिइन् । तर, उनले पहिचान भने फिल्म ‘महल’को गीत ‘आएगा आने वाला’बाट पाइन् ।
उनले ३६ भाषामा ५० हजार गीत गाएकी थिइन् । करिब एक हजार बढी चलचित्रमा उनले आवाज दिएकी थिइन् ।
लता मंगेशकरको जन्म सन् १९२९ सेप्टेम्बर २८ मा भारतको इन्दौरमा भएको थियो ।
