काठमाडौं । नेकपा एमालेका अध्यक्ष केपी शर्मा ओलीले सबै जातजाति एकै ठाउँ बसेको , रमाएको देखेर मन पोल्नेहरुका कारण साम्प्रदायीक सद्भाव कायम राख्न समस्या हुने गरेको बताएका छन् ।
शनिबार काठमाडौंमा आयोजित शुभकामना आदान प्रदान तथा हरितालिका तीज विशेष कार्यक्रमलाई सम्बोधन गर्दै उनले चाडको अर्थ सामाजिक सद्भाव कायम गर्नु भएकाले सबै जातजाति एकै ठाउँ बसेको ,रमाएको देखेर मन पोल्नेहरुले चाडपर्वको महत्व नबुझ्ने टिप्पणी गरे ।
उनले भने, ‘फेरी पनि भन्न सकिँदैन् यस्ता चाडपर्व मन नपराउने, एकता, सबै जातजाति एकै ठाउँ बसेको मन नपराउनेहरु । झगडा गरेर मारामार गर्नुपर्ने कहाँ एकै ठाउँमा बसेर रमाएको देखेर मन भत भत पोल्नेहरु छन् । चाडको अथ त्यस्ता सोचहरुसँग ठ्याम्मै मिल्दैन । किन कि चाडको अर्थ सामाजिक सद्भाव कायम गर्नु हो ।’
उनले ४८ सालमा तीजको बेला कार्यक्रम गर्दा अर्घाखाँचीमा नेपाली कांग्रेसका कार्यकर्ताहरुले महिला दिदी बहिनीहरुलाई कुटपीट गरेर आतङ्क मच्चाएको घट्ना स्मरण गर्दै उनले अझै पनि मानिसहरुको सोच परिर्वतन हुन नसकेको बताए ।
उनले हरेक चाडका पछाडि बिशेष अर्थ र महत्व रहेको भन्दै चाडपर्वले सामाजिक व्यवस्थालाई अझ राम्रो बनाउँने बताए ।
