काठमाडौं नेपाली कांग्रेसको केन्द्रीय समितिको बैठकले मंसिरको १३ देखि १५ गतेसम्म काठमाडौंमा महासमिति बैठक टुंगो लगाएको छ । तेस्तै महासमिति बैठक तयारीका लागि चार वटा समिति गठन गरेको छ। कांग्रेसको बिहीबारदेखि जारि केन्द्रीय समिति बैठकले यस्तो निर्णय गरेको हो ।
कांग्रेस बैठकले पार्टी सभापति शेरबहादुर देउवाको संयोजकत्वमा केन्द्रीय कार्यसमितिका पदाधिकारी, सदस्य, आमन्त्रित सदस्य, प्रदेश कार्यसमितिका सभापति एवं उपत्यकाका तीनै जिल्ला काठमाण्डौ, ललितपुर र भक्तपुरका जिल्ला सभापति, भ्रातृ संस्थाका केन्द्रीय अध्यक्षहरु समेत रहने गरि एक मूल आयोजक समिति गठन गर्ने निर्णय गरेको छ ।
तेस्तै महासमितिको बैठकमा प्रस्तुत गरिने नीतिगत प्रस्ताव तयार गर्न पार्टी उपसभापति एवं नीति, अनुसन्धान तथा प्रशिक्षण प्रतिष्ठानका संयोजक पूर्णबहादुर खड्काको संयोजकत्वमा प्रस्ताव तयारी समिति गठन गर्ने निर्णय गरेको छ । समितिमा केन्द्रीय पदाधिकारीहरु, पार्टी प्रवक्ता र केन्द्रीय सदस्यहरु रहनेछन् ।
महासमितिको बैठकमा पार्टीको सांगठनिक प्रतिवेदन महामन्त्री गगनकुमार थापाले प्रस्तुत गर्नेछन् भने र समसामयिक राजनीतिक प्रस्ताव महामन्त्री विश्वप्रकाश शर्माले प्रस्तुत गर्नेछन् ।
मंसिर १३, १४ र १५ गते महासमितिको बैठक काठमाडौंमा हुने भएको छ ।
