महाधिवेशनको मिति तय भइसकेको अवस्थामा तथा आफुहरुको विरोधलाई वेवास्ता गर्दै सभापति शेरबहादुर देउवाले महाधिवेशनलाई प्रभावित पार्न विभिन्न विभागमा मनोनयन गर्न थालेको निष्कर्ष नेपाली कांग्रेस भित्रको देउवा इतर समुहले लगाएको छ ।
आइतबार गोंगबुस्थित नेता अर्जुननरसिंह केसीको निवासमा बसेको पौडेल समूहका शीर्ष नेताहरुको बैठकले यो विषयमा सवै शीर्ष नेताहरुले सभापति देउवालाई भेटेर विभागको मनोनयन रोक्ने आग्रह गर्ने र त्यसपछि पनि नरोकिए थप कदम चाल्ने निर्णय गरेको छ । कांग्रेस विधानअनुसार महाधिवेशन भएको ६ महिनाभित्र विभागहरु गठन गर्ने उल्लेख छ ।
तर १३ औं महाधिवेशनबाट सभापति बनेका देउवाले चार वर्षे कार्यकालभर विभाग नबनाई महाधिवेशनको तयारीमा लाग्नुपर्ने अवस्थामा विभागमा मनोनयन गरेर महाधिवेशन प्रभावित पार्न खोजेको निष्कर्षमा सो समुह पुगेको छ । कांग्रेसको १४ औं महाधिवेशन फागुन ७–१० मा गर्ने निर्णय भइसकेको छ । २०७६ साल पुस ११ गते पौडेल र कृष्ण सिटौला समूहको बहिस्कारका बाबजुद बहुमतले विधान संशोधन गर्दै विभागहरु २८ बाट ४७ बनाउने निर्णय गरेको थियो ।
पछिल्लो पटक वरिष्ठ नेता पौडेलसँगै महामन्त्री शशांक कोइाला र कोषाध्यक्ष सीतादेवी यादवले पत्र लेखेर असहमति जनाएका थिए । तर देउवाले भने सो असहमतिलाई वेवास्ता गरेपछि सवै शीर्ष नेताहरुले देउवालाई भेटेर असहमति जानउने निष्कर्षमा पुगेको एक नेताले बताए ।
