काभ्रे वैशाख, २०–
कांग्रेसका नेता डा.शेखर कोइरालाले अहिलेको अवस्था निरंकुश राजाको समय भन्दा पनि डरलाग्दो रहेको टिप्पणी गरेका छन् । शुक्रबार नेपाल प्रेस युनियन काभ्रे शाखाको अधिवेशनलाई उद्घाटन गर्दै नेता कोइरालाले सो कुरा बताएका हुन् । उनले अहिलेको सरकारले पत्रकारको मुख र कलम छोप्न खोजेको आरोप लगाए ।
सरकारले साइबर क्राइम र आस्थाका आधारमा पत्रकारलाई पक्राउ गरेर दुःख दिने काम गरेकोमा नेता कोइरालाले आपत्ति समेत जनाए ।
उनले भने, ‘राजाको शासनमा पनि अदालतभित्रैबाट पक्राउ परेको थिएन । जनसुकै क्रुर शासक भएपनि अदालतभित्र पक्राउ गर्न पाइँदैन ।’
नेपाल प्रेस युनियनको केन्द्रीय अधिवेशन गर्न पनि उनले आग्रह गरे । उनले भने, ‘प्रेस युनियनको अध्यक्ष बद्री सिग्देलजी पनि यही हुनुहुन्छ । तपाईले केन्द्रीय अधिवेशन गर्नुस् कांग्रेसलाई बलियो बनाउन भ्रातृ संस्थाहरूको अधिवेशन समयमा गर्नुस् । विधानलाई स्वीकार गर्ने हो भने अधिवेशनभन्दा अर्को बिकल्प छैन ।’
नेपाल प्रेस युनियनलाई तदर्थवादमा नलैजान उनले आग्रह गरे । ‘तदर्थवादमा जानुभयो भने कांग्रेस कमजोर हुन्छ’, डा।कोइरालाले भने, ‘अहिले समयमा अधिवेशन गरिएन भने स्थानीय तहको मुखमा गएर अधिवेशन गर्नुपर्छ । त्यस बेला अधिवेशनको तिक्तताले स्थानीय निर्वाचनमा असर पुर्याउँछ ।’ नेता कोइरालाले कांग्रेसले पनि नयाँ विधानअनुसार वडादेखि केन्द्रसम्मको अधिवेशन गर्नुपर्नेमा जोड दिए ।
