काठमाडौं वैशाख, २५–
आजदेखि प्रमुख प्रतिपक्ष दल नेपाली कांग्रेसले राष्ट्रिय जागरण अभियान सुरु गर्दैछ । कांग्रेसले सरकारविरुद्ध खबरदारी र पार्टी सुदृढीकरणका लागि जागरण अभियान सुरु गर्न लागेको जनाएको छ ।
सरकारले गरेका गलत काम–कारबाहीलाई जनतामाझ लैजान अभियान थालेको कांग्रेसको भनाइ छ । कांग्रेस प्रवक्ता विश्वप्रकाश शर्माले सरकारका गलत काम जनसमक्ष लैजानु र पार्टी संगठनलाई थप सुदृढीकरण आजदेखि अभियान थालनी गर्न लागेको जानकारी गराए ।
कांग्रेसले अभियानमार्फत पार्टीको नीति, कार्यक्रम र संशोधित विधानबारे छलफल गर्ने उद्देश्य समेत रहेको बताएको छ । कांग्रेसले गएको वैशाख ११ गतेदेखि जागरण अभियान थाल्ने तयारी गरे पनि
पार्टीका पूर्वकोषाध्यक्ष रामकृष्ण ताम्राकारको निधन भएपछि निर्धारित कार्यक्रम स्थगित भएको थियो ।
‘हिमाल, पहाड, तराई–मधेसी नेपाली कांग्रेस राष्ट्रिय जागरण अभियान’ नाम दिइएको अभियान ३ चरणमा १ वर्षभरि देशभर चल्ने कांग्रेसले जनाएको छ । आजबाट सुरु हुने पहिलो चरणको अभियान १ महिना चल्नेछ । पहिलो चरणअन्तर्गत ७७ जिल्लामा अभियान सञ्चालन गर्ने कांग्रेसले जनाएको छ । दोस्रोमा ३ सय ३० प्रदेश निर्वाचन क्षेत्र र तेस्रोमा चरणमा ७ सय ५३ स्थानीय तहमा अभियान सञ्चालन गर्ने कांग्रेसको योजना छ ।
जागरण अभियानका लागि कांग्रेसले नेताहरुलाई ७७ वटै जिल्लामा खटाएको छ । कांग्रेसले सम्पादन गर्नुपर्ने कामबारे जिम्मेवारीपत्र दिएर केन्द्रीय नेताहरुलाई जिल्ला पठाएको हो । कार्यक्रमलाई सफल पार्न कांग्रेसले भातृसंगठनहरुलाई पनि जिल्लामा परिचालन गरेको जनाएको छ ।
देशभर एउटै मोडलमा जागरण अभियान कार्यक्रम सञ्चालन गर्ने कांग्रेस केन्द्रीय कार्यालयले ७७ जिल्लामा सर्कुलर समेत गरेको छ । यो पटक कांग्रेसले कार्यक्रम उद्घाटन समेत नयाँ तरिकाले गर्दैछ । कांग्रेसले जनाए अनुसार समी र बर–पिपलमध्ये १ विरुवा रोपेर कार्यक्रम उदघाटन गर्न सबै जिल्लामा कांग्रेसले सर्कुलर गरिएको छ । त्यस्तै, जागरण अभियानमा बजाउन जागरण गीत तयार पारिएको छ । कांग्रेस प्रवक्ता विश्वप्रकाश शर्माले लेखेको गीत नेवारी, मैथिली, राई, भोजपुरीलगायतका १२ भाषामा तयार पारिएको हो ।
कांग्रेस केन्द्रीय समितिको सर्कुलर अनुसार अभियानमा ३ वक्ताले आफ्नो धारणा राख्नेछन् । सबै कार्यक्रममा महिला वक्ता अनिवार्य गरिएको कांग्रेसले जनाएको छ ।
काठमाडौंमा पार्६ी सभापति शेरबहादुर देउवाले मध्याह्न १२ः३० मा जागरण अभियानको उद्घाटन गर्दैछन् । अन्ज्य सबै जिल्लामा कांग्रेसले पार्टी पदाधिकारीसहित केन्द्रीय नेताहरुलाई जिम्मेवारी तोकेको छ ।
