काठमाडौं वैशाख, २७–
नवगठित समाजवादी पार्टी नेपालले राखेको संविधान संशोधनको मागप्रति राष्ट्रिय जनमोर्चाले आपत्ति जनाएको छ ।
उक्त पार्टीका उपाध्यक्ष दुर्गा पौडेलले शुक्रबार एक विज्ञप्ति जारी गर्दै समाजवादी पार्टीले संविधानका कयौ प्रवाधान संशोधनका लागि अगाडि सारेका मागका विषयमा आपत्ति जनाएकी हुन् । साथै पूर्ण समानुपातिक निर्वाचन प्रणाली र कार्यकारी राष्ट्रपतिको प्रणाली अपनाउनु पर्ने तथा देशमा एघार प्रदेशहरू बनाउनुपर्ने मागलाई उनले गलत भन्दै विरोध जनाएकी हुन् ।
जनमोर्चाले वर्तमान संविधानमा भएको सङ्घीय प्रणालीलाई पूरै खारेज गर्नुपर्ने माग अघि सार्दै आएको छ ।
उसले उपयुक्त समयमा संविधानमा त्यसअनुसार संशोधनका लागि प्रस्ताव दर्ता गराउने समेत जनमोर्चाले जनाएको छ ।
