पत्रकार महासंघको आन्दोलन मथ्थर पार्ने अभियानमा नेकपा, आफू निकट पत्रकारलाई सम्झाउन थाल्यो

काठमाडौं जेठ, ५–
सत्तारुढ दल नेकपाले आफू निकट पत्रकारलाई सम्झाउने प्रक्रिया सुरु गरेको छ । नेपाल पत्रकार महासंघले सरकारले ल्याएको प्रेस स्वतन्त्रताविरोधी विधेयकको विरोधमा आन्दोलन गरिरहेकाबेला नेकपाले यस्तो प्रयास थालेको हो । नेकपाका नेताहरुले महासंघको आन्दोलनलाई मथ्थर बनाउने उद्देश्यले आफू निकटका पत्रकारलाई भेटेर सम्भाmउने अभियान थालेको हो ।

्आइतबार बिहानै नेकपाको पार्टी मुख्यालय धुम्बाराहीमा नेकपा निकट पत्रकार संगठनका नेताहरुलाई छलफलका लागि बोलाइएको हो ।

छलफलमा पत्रकार फाँट हेर्ने नेता र प्रचार विभागका नेताहहरुका साथै सञ्चार मन्त्री गोकुलप्रसाद बास्कोटासमेत सहभागी थिए । छलफलमा पार्टीका तर्फबाट दलका उपनेता सुवासचन्द्र्र नेम्वाङका साथै पम्फा भुसाल र योगेश भट्टराई सहभागी थिए ।

कार्यक्रममा प्रेस संगठन नेपालका केन्द्रीय नेता महेश्वर दाहाल लगायतका नेताहरु सहभागी छन् । संगठनका सहसंयोजक गणेश बस्नेत भने सहभागी भएनन् । यद्यपि, सहसंयोजक बस्नेतले आफू बिरामी भएकाले कार्यक्रममा उपस्थित हुन नसकेको बताएका छन् ।

त्यसैगरी नेकपानिकट पत्रकार मानिने प्रेस काउन्सिलका कार्यवाहक अध्यक्ष किशोर श्रेष्ठ पनि कार्यक्रममा उपस्थित थिएनन् । नेकपा निकट पत्रकारको भेलामा पत्रकार महासंघका अध्यक्ष गोविन्द आचार्यलाई पनि निम्त्याइएको थिएन । श्रेष्ठ र आचार्य दुवैले आफूहरुलाई सो भेलाबारे कुनै जानकारी नभएको बताएका छन्

सरकारले संसदमा प्रस्तुत गरेको मिडिया काउन्सिलसम्बन्धी विधेयकमा पत्रकारलाई १० लाखसम्म जरिवाना तिराउने प्रावधान राखिएको भन्दै पत्रकार महासंघका अध्यक्ष गोविन्द आचार्य र प्रेस संगठन नेपालका सहसंयोजक गणेश बस्नेत विधेयकको विपक्षमा उभिँदै आएका छन् । प्रेस काउन्सिलका कार्यवाहक अध्यक्ष श्रेष्ठ पनि सरकारले ल्याएको विधेयकको विपक्षमा छन् ।

सरकारले ल्याएको प्रेस स्वतन्त्रताविरोधी विधेयक नसच्याएसम्म महासंघको आन्दोलन नरोकिने आचार्यले बताउँदै आएका छन् ।

सरकारले विधेयक नसच्याएसम्म पत्रकार महासंघको आन्दोलन जारी रहने आचार्यले अनलाइनखबरलाई बताए । उनले भने, ‘सरकारले विधेयक फिर्ता लिनुपर्‍यो, वा संसदमा यसलाई संशोधन गर्छौं भनेर रुलिङ पार्टीबाट आधिकारिकरुपमा आउनुपर्‍यो । हाम्रो मुख्य माग भनेकै यो विधेयक सच्चिनुपर्‍यो भन्ने हो ।’

आइतबार धुम्बाराहीमा आयोजना गरिएको भेला त्यसैको सिलसिला भएको नेकपाका एक नेताले जानकारी दिए ।

छलफलमा सहभागी मन्त्री बास्कोटाले विधेयक फिर्ता नहुने अडान राखेको भेलामा सहभागी पत्रकारले जनाएका छन् ।