मौसम अपडेट

नेपाली पात्रो

विदेशी विनिमय दर अपडेट

राशिफल अपडेट

सुन चाँदी दर अपडेट

Title

ओलीको बोली र काम गराईले संवैधानिक संकट आउने खतरा बढ्योः कांग्रेस नेता प्रकाशमान सिंह



काठमाडौं जेठ, १२–
कांग्रेस नेता प्रकाशमान सिंहले सरकारको गलत रवैयाप्रति सजग रही निरन्तर खबरदारी गरिरहन आफ्ना कार्यकर्तालाई निर्देशन दिएका छन् । नेता सिंहले प्रधानमन्त्री केपी शर्मा ओलीका बोली र काम गराई संविधानको मर्मविपरित रहेको भन्दै त्यसबाट संवैधानिक संकट आउने सक्ने खतरा रहेको समेत बताएका हुन् ।
आइतबार काठमाडौं क्षेत्र नम्बर १ मा राष्ट्रिय जागरण अभियान अन्तर्गत कार्यक्रमलाई सम्बोधन गर्दै नेता सिंहले वर्तमान सरकार संघीयता असफल बनाउन क्रियाशील रहेको दावी गरे ।
पूर्वमहामन्त्री समेत रहेका सिंहले भने, ‘प्रधानमन्त्रीमा अंहकार र दम्भ बढेको छ । संविधान केही होइन, अब म जे बोल्छु त्यही नै सबैले मान्नुपर्छ भने जस्तोगरी प्रस्तुत हुनु अशोभनीय छ ।’ उनले दम्भ र अहंकार त्यागेर संविधानको पालना गर्न सरकारलाई सचेत समेत गराए ।

प्रधानमन्त्री ओलीले आफूलाई नसच्याए जनतासँगको भावनात्मक सम्बन्ध टुट्ने र अहंकार पनि अन्त हुने उनले चेतावनीसमेत दिए । जनअपेक्षा धेरै भए पनि वर्तमान सरकार भाषामा मात्र सीमित रहेको र कान्डै कान्डमा मुछिएको भन्दै उनले अहिलेको सरकारबाट कुनै आश गर्न नसकिने बताए ।
कांग्रेसको कार्यकर्ता हुँ भन्ने, तर अनुशासनमा नबस्ने, कुनै नेता विशेषको बनेर पार्टीभित्र असहयोग गर्नेहरुलाई ठेगान नलगाउँदासम्म कांग्रेस बलियो हुन नसक्ने नेता सिंहको तर्क थियो ।
राजधानीबासीको सबैभन्दा चासो र सरोकार जोडिएको मेलम्ची खानेपानीको काममा भ्रष्टाचार भएका कुराहरु सार्वजनिक भइरहेकाले यो दुःखद भएको बताए । ‘मन्त्री र सचिवले ठेकेदार कम्पनीसँग पैसा मागेकाले ठेकदार कम्पनीले हात झिकेको कुरा आइरहेको छ । यो अत्यन्त दुःखद हो,’ उनले भने ।

भ्रष्टाचारका मुद्दाहरुमा निष्पक्ष ढंगले छानबिन गरेर दोषीलाई दन्डित गर्न समेत सरकारले आनाकानी गरिरहेको उनले बताए । भ्रष्टाचार गर्दिनँ भन्ने नारा जप्ने, तर ठूला भ्रष्टाचारका मुद्दाहरु ओझेलमा पार्दै जाने काम अहिलेको सरकारले गरेको उनको भनाइ छ ।
पद ओगटेका व्यक्तिहरुले पार्टी र संगठनको काम झारा टारेजस्तो गरी गरिरहेको उनको भनाइ थियो । उनले भने, ‘कांग्रेसको कार्यकर्ता हुँ भन्ने, तर अनुशासनमा नबस्ने, कुनै नेता विशेषको बनेर पार्टीभित्र असहयोग गर्नेहरुलाई ठेगान नलगाउँदासम्म कांग्रेस बलियो हुन सक्दैन ।’

प्रकाशित मिति : १२ जेष्ठ २०७६, आइतबार  ७ : ०६ बजे