गुठी विधेयक संशोधन गरे काठमाडौंमा आन्दोलनको हुरी चल्ने कांग्रेस सांसद भीमसेनदास प्रधानको चेतावनी



काठमाडौं जेठ, ३०–
नेपाली कांग्रेसका सांसद भीमसेनदास प्रधानले गुठीको अस्थित्व समाप्त पारेर काठमाडौं उपत्यकाको सम्पदामाथि धावा नबोल्न सरकारलाई चेतावनी दिएका छन् । बिहिबार संसदको बैठकमा बोल्दै कांग्रेस केन्द्रीय सदस्य समेत रहेका प्रधानले काठमाडौंमा आन्दोलनको हुरी चल्न लागेको भन्दै समयमै गुठी विधेयक संशोधन गर्नेतर्फ लाग्न सरकारलाई सुझाव दिएका हुन् ।
सांसद प्रधानले अन्तर्राष्ट्रिय समुदायलाई चिनाएको भाषा संस्कृति र सम्पदामाथि सरकारले धावा बोलेको आरोप लगाएका हुन् ।

‘सरकारलाई ज्ञान होला, काठमाडौंका जनता उठेपछि कुनै शक्तिले रोक्न सक्दैन, राणा शासन ढल्यो, २०४६ सालमा काठमाडौंका जनता उठ्यो र बहुदल आयो । प्रतिगमनको कुरामा साथ दिएको थिएन गणतन्त्रको नारा लागेपछि आन्दोलन उठ्यो र राजतन्त्र फ्याक्यो,’ पूर्व रक्षामन्त्री समेत रहेका प्रधानले भने, ‘हेक्का राख्नुस् केपी ओली सरकार ढल्ने चिन्ता होइन, हामीले ल्याएको संविधान डिरेल होला भन्ने चिन्ता हो ।’

पृथ्वीनाराण शाहले काठमाडौंको राज्य जितेपछि पनि संस्कृतिमा धावा नबोलेको स्मरण गर्दै उनले समयमै विधेयक सच्चाउन माग गरे । ‘काठमाडौंमा आन्दोलनको हुरी चल्दैछ, बादल गर्जिंदैछ, कतै त्यो आन्दोलनले संविधान डिरेल नहोस् । यो विधेयक संशोधन गरेन भने आन्दोलन चर्किन्छ, त्यसले कहाँ पुर्‍याउन भन्न सकिन्न,’ प्रधानले भने । प्रमुख विपक्ष दल कांग्रेसले गुठी विधेयक संशोधन गर्ने सरकारको निर्णयको विरोधमा संसदमा लगातार आबाज उठाउदै आएको छ ।

प्रकाशित मिति : ३० जेष्ठ २०७६, बिहिबार  ८ : १७ बजे