काठमाडौं असार, २२–
सीमा नाकामा विषादी परीक्षण गरेर मात्रै आयात गर्ने अडान लिएको दुईसाता भित्रैमा सरकार आफ्नो निर्णयबाट पछि हटेको छ । चर्को भारतीय दबाबपछि विषादी परीक्षण नगरी फलफूल र तरकारी आयात शुरु भएको छ । नेपाल समाचार पत्र दैनिकले समाचार छापेको छ ।
सरकारले गत असार दुई गते राजपत्रमा सूचना प्रकाशित गरी भन्सार बिन्दुमा क्वारेन्टाईन र जीवनाशक विषादीको अवशेष अनिवार्य परीक्षण गर्ने नीति ल्याएको थियो । तरकारी र फलफूलको आयात प्रभावितबारे चासो लिएको भारतीय दूतावासले सरकारलाई लिखित पत्र पठाएपछि मन्त्री परिषद्ले निर्णय फिर्ता लिएको हो ।
नेपालको परिवर्तित नीतिले आफ्ना कृषक र व्यवसायी मारमा परेको जनाउँदै दूतावासले लिखित पत्र नै पठाएर दबाव दिएपछि बिहीबारको मन्त्रिपरिषद् बैठकले ६ महिनाका लागि यो नीति स्थगित गरेको कृषि मन्त्रालय स्रोतले जनाएको छ । तर सरकारले भने विषादी परीक्षणका लागि आवश्यक ल्याब, उपकरण र अन्य तयारी पर्याप्त नभएको कारण देखाउँदै तत्कालका लागि परीक्षणकार्य स्थगित गरिएको जनाएको छ ।
जनस्वास्थ्यसँग जोडिएको विषयबारे सरकार गम्भीर नभएको र आफ्नो निर्णयबाट पछि हटेकोमा सत्तारुढ दल नेकपाको नेतृत्व नै असन्तुष्ट बनेको छ । सरकार जनताको स्वास्थ्यप्रति सचेत र गम्भीर नभएको बताउँदै नेकपाका वरिष्ठ नेता माधवकुमार नेपालको भनाइ छ । ‘सरकारले खाद्यान्न, तरकारी र फलफूलमा विषादी नभएको विश्वास दिलाउनुपर्छ, कर्मचारी र उपकरण अभाव देखाउँदै जनतालाई विषादीयुक्त खाद्यान्न उपभोग गर्न बाध्य पारिनु हुँदैन’ –शनिबारको नेकपा संसदीय दलको बैठकपश्चात उहाँले सञ्चारकर्मीसँग भन्नुभयो ।
कसैका दवाब सामु झुक्न नहुने बताउँदै नेता नेपालले विषादी परीक्षण नगर्ने निर्णयमा पुनः विचार गर्न आग्रह गर्नुभयो । नेकपाका अर्का नेता भीम रावलले मन्त्रीपरिषद्को निर्णयप्रति आश्चर्य व्यक्त गर्दै कसैको आग्रहमा जनताको हितप्रतिकूलको निर्णय गर्नुलाई स्वभाविक मान्न नसकिने बताउनुभयो । उहाँले भन्नुभयो– ‘एउटा स्वतन्त्र र सार्वभौम देशले सिमानामा तरकारी र फलफूल जाँच्न नपाउने अनि जाँच्न खोज्दा कसैले पत्र पठायो भन्दैमा तुरुन्त निर्णय फिर्ता लिनु सरकारका लागि सुहाउने कुरा होइन ।’
