नेपालगन्ज उपमहानगरपालिकाका मेयर धवल शम्शेर राणाले एमसीसी सहयोग बिना पनि नेपाल अगाडि बढ्न सक्ने बताएका छन् । राष्ट्रिय प्रजातन्त्र पार्टी (राप्रपा) का नेता समेत रहेका राणले एमसीसीकोबारेमा जनतालाई बुझाउन नसके खारेज गर्नुपर्ने बताएका हुन् ।
‘जनताको अधिक चासो, चिन्ता र विरोध रहेको एमसीसीको यथार्थ अवस्था कि त जनतालाई बुझाउन सक्नुपर्यो, नत्र खारेज गर्नुपर्यो ।’ उनले ट्वीट गर्दै भने ‘अन्य देशहरूसँग पनि आर्थिक सहयोग लिने गरेको नेपालले यो एमसीसीमा जनताको यति धेरै चासो, चिन्ता र विरोध किन छ ?’
‘यदि नेपालीको लागि सहयोग हो भने बुझाउन सक्नुपर्यो, नत्र यो आर्थिक सहयोग बिना देशै अगाडि नबढ्ने होइन, यसलाई खारेज गरौ,’ राणाले भने । राप्रपाका प्रभावशाली नेता राणाले आसन्न महाधिवेशनमा पार्टी अध्यक्ष पदमा उम्मेदवारी दिने घोषणा गरिसकेका छन् ।
दोस्रो पुस्तामा नेतृत्व हस्तान्तरण हुनुपर्छ भन्ने माग र बहस राप्रपा भित्र व्यापक बनिरहेको अवस्थामा लोकप्रिय नेता राणाले नेतृत्वको लागि दावी अघि सारेका हुन् ।
