भाडा समायोजनको माग राख्दै यातायात व्यवसायीहरू सोमबार सार्वजनिक यातायात सडकमा तेर्साएर आन्दोलनमै उत्रेका छन् । बढेको भाडादर कायम नभएको भन्दै यातायात व्यवसायीहरूले सडकमा गाडी तेर्साएर आन्दोलन गरेका हुन् ।
सार्वजनिक यातायात केन्द्रीय महासंघको आह्वानमा काठमाडौं उपत्यकाभित्र र छोटो दूरीमा चल्ने सवारीको सेवा बन्द गर्दै व्यवसायीहरूले आन्दोलन शुरु गरेका हुन ।उपत्यकाका विभिन्न स्थानमा ‘अब हामी यातायात व्यवसाय सञ्चालन गर्न सक्दैनौँ । हाम्रो माग तत्काल पुरा गर’ भन्दै सडकमा गाडी तेर्साएर व्यवसायीहरूले आन्दोलन गरिरहेका छन् । सरकारले यसअघि बढाएको भाडादर समायोजन नगरेको भन्दै आन्दोलनमा उत्रनु परेको आन्दोलित यातायात व्यवसायीले बताएका छन् ।
महासंघका महासचिव केशव नेपालले बाग्मती प्रदेश सरकारले प्रदेशस्तर र स्थानीय रुटमा चल्ने सार्वजनिक सवारीको भाडा नबढाएपछि आन्दोलनमा जानु परेको बताए । उनका अनुसार सोमबार सार्वजनिक सवारी सडकको किनारमा रोकेर सांकेतिक रुपमा विरोध प्रदर्शन गरिएको हो ।
