काठमाडौं जेठ, २९–
नेपाली कांग्रेसका नेता तथा सांसद प्रकाशमान सिंहले संविधान कुल्चिएर गुठी संस्कृति सखाप पार्ने दूर्नियत राखेर सरकार अघि बढेको आरोप लगाएका छन् । बुधबार संसद बैठकमा बोल्दै नेता सिंहले सरकारले ल्याएको गुठी विधेयकमाथि आपत्ति जनाएका हुन् । उनले सम्बन्धित पक्षसँग छलफल नै नगरी हजारौं वर्षदेखि चल्दै आएको गुठी परम्परालाई ध्वस्त गराउनेगरी सरकारले नियोजित रुपमा यो गुठी विधेयक ल्याएको आरोप समेत लगाए । नेता सिंहले प्रश्न गरे। यो विधेयकले गुठीयारहरुको हकमा पनि निजी गुठीलाई सार्वजनिक गुठीमा लगेर यसको अस्तित्व नै समाप्त गर्नेगरी यो विधेयक कसको लागि केकालागि ल्याएको हो ?
अहिलेको अवस्थामा गुठी विधेयक परिमार्जन गर्नुको आवश्यकता के हो ? भन्दै हजारौं हजार संख्यामा चल्दै आएको गुठीको अस्तित्व नामेट पार्ने अधिकार गुठीको नरहेको उनले बताए ।
उनले पुस्तौं पुस्तादेखि सञ्चालन गर्दै आएको निजी गुठीलाई नियन्त्रण गर्न खोजेको भन्दै यो संविधानको धारा २९० को विपरित रहेको बताएका छन् । त्यो निजी सम्पत्ति राख्ने अधिकार र धार्मिक स्वतन्त्रताको अधिकारमाथि समेत यो ऐनमा उल्लेखित व्यवस्थाले हनन् गरेको नेता सिंहको आरोप थियो ।
यसअघि आजको संसद बैठकमा कांग्रेस सांसदहरुले उठेर विरोध गरेका थिए ।
