काठमाडौं –
संघीय संसदको संसदीय सुनुवाइ समितिले लक्ष्मीबहादुर निरालाको नाम न्याय परिषद् सदस्यमा सर्वसम्मत अनुमोदन गरेको छ ।
आइतबार बसेको समिति बैठकले निरालाको नाम सर्वसम्मत अनुमोदन गरेको हो । प्रधानमन्त्री केपी शर्मा ओलीले निरालाको नाम सिफारिस गरेका थिए ।
समितिले १० दिनको म्याद दिएर उनीविरुद्ध उजुरी आह्वान गरेपछि कुनै पनि उजुरी परेको थिएन ।
समिति सभापति लक्ष्मणलाल कर्णले योग्यता, क्षमता र अनुभवका आधारमा निराला न्याय परिषद् सदस्यका लागि योग्य रहेकाले सर्वसम्मत अनुमोदन गर्ने निर्णय भएको बताए ।
न्यायपरिषद् सदस्यमा सिफारिस निरालाले समितिबाट अनुमोदन हुनुअघि छलफलमा आफू निष्ठापूर्वका काम गर्ने प्रतिबद्धता जनाए । जीवनको उत्तराद्र्धमा कुनै दायाँ–बायाँ गर्नुपर्ने आवश्यकता नरहेको भन्दै उनले आफूमाथि गरिएको विश्वासलाई असर पर्न नदिने बताए ।
सांसद भीमसेनदास प्रधानले न्यायप्रति जनताको विश्वास घट्दै गएकामा कुनै पूर्वाग्रह र राजनीतिक भागबन्डाभन्दा टाढा रहेर निष्पक्ष ढंगले न्यायाधीश नियुक्तका लागि सुझाव दिए ।
सांसद देव गुरुङले शाहीकालमा पनि काम गरेको र अहिले फरक परिवेशमा पनि न्याय परिषदमा सिफारिस भएको अवस्थालाई कसरी लिनुहन्छ भनेर प्रश्न गरेका थिए ।
सांसद राजेन्द्र श्रेष्ठले अन्य क्षेत्र जस्तै न्यायधीश सिफारिसमा समेत राजनीतिक भाबबन्डा हुने गरेको भन्दै यसको रोकथामका लागि कस्तो भूमिका खेल्नुहुन्छ भन्दै प्रश्न गरेका थिए ।
निरालाले न्यायाधीश नियुक्तिमा हुने भागबन्डा रोक्ने प्रतिबद्धता जनाउँदै निष्ठापूर्वक काम गर्ने जवाफ दिएका थिए ।
