महोत्तरी फागुन, १–
बर्दिवासमा ढुंगा बोकेको टिपर बीच सडकमा दुर्घटना हुँदा दश जना घाइते भएका छन् । ना ३ ख नम्बरको ढुङ्गा लोड गरिएको टिपर बर्दिबासको मुख्य चोकमा दुर्घटना भएको हो ।
घाइतेमध्ये दुई जनाको अवस्था गम्भीर रहेको छ । जिल्ला ट्राफिक प्रहरी कार्यालय बर्दिवासका अनुसार ढुङ्गा लोड गरिएको टिपर बीपी राजमार्ग हुँदै बर्दिवास आउँदै गर्दा अनियन्त्रित भई मुख्य चोकमा दुर्घटना भएको हो ।
गम्भीर घाइते बर्दिवास नगरपालिका ११ बस्ने ३० बर्षका मीनबहादुर थापालाई थप उपचारको लागि काठमाडौं लगिएको छ । अन्य घाइतेहरुको बर्दिवासस्थित जनसेवा हस्पिटल र शुभस्वस्तिक हस्पिटलमा उपचार भइरहेको छ ।
ढुङ्गा लोड गरीएको टिपरबाट खसेको ढुङ्गाले लागेर राजमार्ग क्षेत्रमा हिँडिरहेका सर्वसाधारण घाइते भएका हुन् । दुर्घटनाका कारण ५ वटा मोटरसाइकल र एउटा अटोरिक्सा पूर्ण रुपमा क्षति भएको छ ।
बीपी राजमार्ग हुँदै आउने सानाठुला सवारी साधन मुख्य चोकमा दुर्घटना हुने क्रम बढेको छ । ओरालो बाटो भएको र तीव्र गतिमा सवारी चलाउँदा दुर्घटनाको जोखिम बढेको स्थानीय बताउँछन् ।
