काठमाडौं फागुन, २१–
सिरहाको दक्षिणवर्ती भगवानपुर गाउँपालिका–४ मा पर्ने ठाडीबजार भारतीय सीमासँग जोडिएको अन्तिम नेपाली गाउँ हो । गाउँपालिका क्षेत्रमा तीन माविसहित १६ वटा सामुदायिक विद्यालय छन् ।
विद्यालयको संख्या धेरै भए पनि नियमित पठनपाठन हुँदैन । जसका कारण ठाडी क्षेत्रका ६ सयभन्दा धेरै नेपाली विद्यार्थी भारतीय लौकाहा बजार क्षेत्रमा पर्ने भारतीय विद्यालयमा पढ्न बाध्य छन् । नयाँ पत्रिका दैनिकले समाचार छापेको छ ।
स्थानीय जमुवा, बिसौल, कल्याणपुर गाउँका करिब चार सय घरधुरीलाई पायक पर्ने गरी ठाडी विश्वासपट्टिमा ०१५ सालमा स्थापित कक्षा आठसम्म पढाइ हुने आधारभूत तहको विद्यालय पनि छ । विद्यालयको भवन, कक्षाकोठा पर्याप्त छन् । स्थायी दरबन्दीका सातजना शिक्षक मात्र छन् । विद्यार्थीको संख्या भने निकै न्यून छ ।
आफ्नो घर–आँगनमा रहेको विद्यालयमा पढाइ नहुँदा विद्यार्थीहरू भारतीय विद्यालय पढ्न विवश छन् । अधिकांश विद्यालयको हालत उस्तै छ । ‘विद्यार्थी रजिस्टरमा मात्र भएपछि विद्यालय आएका शिक्षकको गफ चुट्ने कामबाहेक केही हुँदैन,’ विद्यालयनजिकै घर रहेका वृद्ध हजारी साहले भने ।
ठाडी बजार घर भएका रामउद्गार पासवानका जेठा छोरा शिवमकुमार भारतीय बजार लौकाहामा रहेको निजी विद्यालय ज्ञान भारती निकेतनमा कक्षा ६ मा पढिरहेका छन् । उनका भाइ सुन्दरम् पनि त्यही विद्यालयमा कक्षा दुईमा पढ्छन् । उनकै छिमेकी आराधना यादव र कुमकुम कर्ण कक्षा ७ तथा लक्ष्मी यादव कक्षा पाँचमा लौकाहा बजारको राजकीय कन्या मध्य विद्यालयमा पढिरहेका छन् ।
आराधना, लक्ष्मी, कुमकुमजस्ता ६ सय विद्यार्थी भारतीय लौकाहा बजारमा भारतीय सरकारको लगानीमा सञ्चालित तीनवटा आधारभूत, एक मावि र १०ं२ तहको एकसहित पाँचवटा सरकारी विद्यालयमा पढ्ने गरेका छन् ।
