काठमाडौं फागुन, २१–
मंगलबार देशैभरका सामुदायिक विद्यालयको पठनपाठन ठप्प भएको छ । राहतमा कार्यरत शिक्षकको आन्दोलनले देशभरका सामुदायिक विद्यालय ठप्प भएका हुन् । उनीहरुले सोमबार प्रहरीले गरेको हस्तक्षेपको विरोधमा आज विद्यालय बन्द गराएका हुन् ।
नेपाल राहत शिक्षक संघर्ष समितिका अध्यक्ष खेमराज अधिकारीले पटक–पटक आन्दोलन गर्दा पनि सरकारले सुनुवाइ नगरेकाले विद्यालय बन्द गर्नु परेको बताए । सरकारसँग जति पटक छलफल गरेपनि आश्वासन मात्रै दिने गरेको र माग पूरा नगरेकाले बाध्य भएर विद्यालय बन्द गर्नु परेको उनको भनाइ छ ।
सोमबार उनीहरूले काठमाडौंमा प्रदर्शन गरेका थिए । प्रदर्शनका क्रममा प्रहरीले धरपकड गरेको थियो । जसमा केही शिक्षक घाइते भएका छन् ।
आन्दोलनरत शिक्षकहरुले अब आफ्ना माग सुनुवाइ नहुँदासम्म विद्यालय खुल्न नदिने बताएका छन् । शान्तिपूर्ण रुपमा प्रदर्शन गर्दा अपराधिलाई जस्तो व्यवहार गरेकाले अध्यक्ष अधिकारीको आरोप छ । मंगलबार दिउँसो पनि माइतीघर मण्डलमा प्रदर्शन गर्ने उनीहरुले बताएका छन् ।
