काठमाडौं फागुन, २३–
स्वतः स्थायी हुनुपर्ने माग राखेर आन्दोलनमा उत्रिएका शिक्षक र सरकारबीच ३ बुँदे सहमति भएको छ । बिहीबार बिहान शिक्षा मन्त्रालयमा भएको वार्तामा तीन बुँदे सहमति भएको हो । सहमतिपछि गएको सोमबारदेखि आन्दोलरत राहत शिक्षकले आन्दोलन फिर्ता लिएका छन् ।
आज भएको सहमति अनुसार तत्काललाई अस्थायी, राहत, बाल विकास केन्द्र ईसीडीका शिक्षकका लागि आन्तरिक प्रतिस्पर्धातर्फ प्रस्ताव गरिएको २० प्रतिशत कोटा हटाइएको छ । शिक्षा सम्बन्धमा बनेको विधेयक अर्थात राष्ट्रिय शिक्षा ऐनमाथि थप छलफल गर्ने र छलफलमा राहत शिक्षकलाई पनि समावेश गर्ने उक्त सहमतिमा उल्लेख गरिएको छ ।
त्यस्तै, आन्दोलनका क्रममा प्रहरीले बल प्रयोग गर्दा घाइते भएका शिक्षकहरुको निःशुल्क उपचार गर्ने समेत सहमति भएको छ । राहत शिक्षक संघर्ष समितिका अध्यक्ष खेम अधिकारीका अनुसार ऐन पारित भएपछि नियमावली बनाउँदा आन्तरिक प्रतिस्पर्धातर्फको कोटा बढाउने र अस्थायी शिक्षकलाई स्थायी प्रक्रियामा लैजाने सहमति भएको छ ।
उनका अनुसार शिक्षा मन्त्रालयसँग सहमति भएपछि आन्दोलन गर्न काठमाडौं आएका राहत शिक्षक आजैदेखि विद्यालयको पठनपाठनमा फर्किने भएका छन् ।
