काठमाडौँ । नेपाली कांग्रेसले प्रधानमन्त्री वालेन्द्र साह बालेनको आइतबारदेखि हुने दुई दिने भारत भ्रमण सफल र उपलब्धिमूलक बनाउन राष्ट्रिय हितलाई प्राथमिकता दिन आग्रह गरेको छ ।
प्रधानमन्त्रीको भारत भ्रमणका सन्दर्भमा पार्टीका वरिष्ठ उपसभापति विश्वप्रकाश शर्माले विज्ञप्ति जारी गर्दै दुई राष्ट्रबीचको सम्बन्धलाई थप प्रगाढ बनाउँदै नेपालको सर्वोत्तम राष्ट्रिय हितमा भ्रमण उपयोगी हुनुपर्ने बताएका छन् ।
सङ्घीय संसद्को प्रमुख प्रतिपक्ष दल कांग्रेसले भारतसँगको द्विपक्षीय सम्बन्ध र सहकार्यका सम्भावित विषयमा सरकारलाई रचनात्मक सुझाव दिने उद्देश्यले विषयविज्ञको सहभागितामा विशेष आन्तरिक विमर्श गरेको उल्लेख छ ।
जलवायु परिवर्तन, हवाई सम्पर्क, पर्यटन, व्यापार, ऊर्जा, खेलकुद, उद्यमशीलता, सीमा व्यवस्थापन, सीमावर्ती क्षेत्रका नागरिकका सरोकार तथा भारतमा कार्यरत नेपाली श्रमिकका समस्यालगायत विषयमा छलफल गरिएको कांग्रेसले जनाएको छ ।
नेपाल–भारत सम्बन्धलाई पारस्परिक सम्मान, सार्वभौमिक समानता र राष्ट्रिय हितका आधारमा सुदृढ बनाउन कांग्रेसले ऐतिहासिक भूमिका निर्वाह गर्दै आएको उल्लेख गर्दै वक्तव्यमा दुई देशबीचको सम्बन्धका सम्भावना, अवसर र व्यावहारिक जटिलताबारे पार्टीसँग लामो संस्थागत अनुभव र स्पष्ट बुझाइ रहेको जनाइएको छ ।
प्रधानमन्त्री राष्ट्रको प्रतिनिधित्व गर्दै भारत भ्रमणमा जान लागेको उल्लेख गर्दै कांग्रेसले राष्ट्रिय हितका विषयमा व्यापक परामर्श र साझा समझदारी निर्माण हुन सके अन्तरराष्ट्रिय मञ्चमा नेपालको अडान बलियो हुने जनाएको छ ।
नेपालको राष्ट्रिय हित र मित्रराष्ट्र भारतसँगको सम्बन्ध सुदृढ बनाउने विषयमा आफ्नो प्रतिबद्धता स्पष्ट र अटल रहेको कांग्रेसको भनाइ छ ।
कांग्रेसले विगतका प्रतिबद्धता कार्यान्वयन, विद्यमान समस्याको ठोस समाधान र पारस्परिक हितमा आधारित दीर्घकालीन सहकार्यको नयाँ आधार निर्माणमा भ्रमण केन्द्रित हुनुपर्नेमा जोड दिएको छ ।
वरिष्ठ उपसभापति शर्माले प्रधानमन्त्री साहको भ्रमणको पूर्ण सफलताको कामना गर्दै भ्रमणको सफलतासँग नेपालको सफलता जोडिएको उल्लेख गरेका छन् ।
कांग्रेसको विज्ञप्ति
५ मंसिर ०८३
प्रधानमन्त्रीको भारत भ्रमणका सन्दर्भमा
सम्माननीय प्रधानमन्त्री बालेन्द्र शाहको मंसिर ६ देखि प्रारम्भ हुने मित्रराष्ट्र भारतको भ्रमण सफल र उपलब्धिमूलक रहोस्, कामना साथ नेपाली कांग्रेस दुई मित्र राष्ट्रको सम्बन्धमा प्रगाढतासँगै नेपालको सर्वोत्तम राष्ट्रिय हितमा यो भ्रमण उपयोग हुन सकोस्, शुभकामना व्यक्त गर्दछ ।
मित्रराष्ट्रहरूको महत्त्वपूर्ण भ्रमण अघि राष्ट्रिय हितका विषयमा साझा धारणा निर्माण गर्न प्रमुख प्रतिपक्ष लगायत राजनीतिक दलहरूसँग परामर्श गर्ने हाम्रो स्थापित लोकतान्त्रिक परम्परा हो । यस्तो सकारात्मक परम्पराको निरन्तरता वर्तमान सरकारबाट पनि अपेक्षित थियो ।
यही अपेक्षाका साथ नेपाली कांग्रेसले भारतसँगको द्विपक्षीय सम्बन्ध र सहकार्यका सम्भावित विषयहरूमा सरकारलाई रचनात्मक सुझाव दिने तयारी गरेको थियो । जलवायु परिवर्तन, हवाई सम्पर्क, पर्यटन, व्यापार, ऊर्जा, खेलकुद, उद्यमशीलता, सीमा व्यवस्थापन, सीमावर्ती क्षेत्रका नागरिकका सरोकार तथा भारतमा कार्यरत नेपाली श्रमिकका समस्या लगायत विषयमा हामीले गत बुधबार बिषय बिज्ञहरुको सहभागितामा ञबिशेष आन्तरिक विमर्शझ गरेका थियौँ ।
नेपाल–भारत सम्बन्धलाई पारस्परिक सम्मान, सार्वभौमिक समानता र राष्ट्रिय हितका आधारमा सुदृढ बनाउन नेपाली कांग्रेसले ऐतिहासिक भूमिका निर्वाह गर्दै आएको छ । हाम्रो सम्बन्धका सम्भावना, अवसर र व्यवहारिक जटिलता बारे नेपाली कांग्रेससँग लामो संस्थागत अनुभव र स्पष्ट बुझाइ छ । यही आधारमा प्रधानमन्त्रीको भ्रमणलाई सकारात्मक बल पुर्याउने हाम्रो योजना र तत्परता थियो ।
तर, सरकारले प्रमुख प्रतिपक्ष, अन्य दल एवं बिषय बिज्ञहरुसँग परामर्श गर्न आवश्यक ठानेन । राष्ट्रिय महत्त्वको भ्रमण अघि राष्ट्रको साझा धारणा निर्माण गर्ने स्थापित लोकतान्त्रिक अभ्यासलाई निरन्तरता दिन समेत आवश्यक ठानेन । त्यसैले नेपाली कांग्रेसले पनि सरकारले नमागेको औपचारिक सुझाव आफैँ अघि सारिरहन उचित ठानेन ।
प्रधानमन्त्री कुनै एक दल वा सरकारको मात्र होइन, सम्पूर्ण राष्ट्रको प्रतिनिधित्व गर्दै भारत भ्रमणमा जाँदै हुनुहुन्छ । राष्ट्रिय हितका विषयमा जति व्यापक परामर्श र साझा समझदारी निर्माण हुन्छ, अन्तर्राष्ट्रिय मञ्चमा नेपालको अडान त्यति नै बलियो हुन्छ, तर दुर्भाग्यवश यो गहिरो वास्तविकता सरकारले आत्मसात गर्न
सकेन ।
यद्यपि, सरकारको यस कमजोरीलाई हामी प्रधानमन्त्रीको भ्रमणको संभावित बिषयवस्तुसँग जोडेर हेर्न चाहँदैनौँ । सरकारसँग हाम्रो विविध असहमति हुन सक्छ, तर नेपालको राष्ट्रिय हित र मित्र राष्ट्र भारतसँगको सम्बन्ध सुदृढ बनाउने विषयमा हाम्रो प्रतिबद्धता प्रधानमन्त्रीको साथमा स्पष्ट र अटल छ । यो भ्रमणको सफलतासँग हाम्रो देशको सफलता गाँसिएको छ, अतः नेपाली कांग्रेस यो भ्रमणप्रति हार्दिक शुभेच्छा प्रकट गर्दछ ।
हाम्रो अपेक्षा छ( यो भ्रमण क्षणिक लोकप्रियता आर्जन गर्ने वा तात्कालिक प्रचारमा सीमित नबनोस् । विगतका प्रतिबद्धताहरुको कार्यान्वयन, विद्यमान समस्याहरुको ठोस निदान र पारस्परिक हितमा आधारित दीर्घकालीन सहकार्यको नयाँ आधार निर्माण गर्न यो अवसरको उपयोग हुन सकोस् र भ्रमण सार्थक बनोस् ।
भ्रमणको सफलता औपचारिक स्वागत, संयुक्त वक्तव्य वा गरिएका घोषणाले होइन, त्यसबाट नेपाल र नेपाली नागरिकले प्राप्त गर्ने ठोस परिणामले निर्धारण गर्नेछ, भन्नेमा नेपाली कांग्रेस स्पष्ट छ ।
नेपाली कांग्रेस प्रधानमन्त्रीज्यूको भारत भ्रमणको पूर्ण सफलताको कामना गर्दछ ।
जय नेपाल !
विश्वप्रकाश शर्मा
वरिष्ठ उपसभापति










