काठमाडौं पुस, २०–
रेशम चौधरीको शपथको बिषयलाई लिएर सत्तमरुढ दल नेकपा भित्रका नेताहरुबीच मतभेद बढेको छ । नेपाल कम्युनिष्ट पार्टीको सुदूर पश्चिम इन्चार्ज भीम रावलले चौधरीको शपथप्रति असन्तुष्टि जनाएका हुन् । उनले आफू नेकपाको सुदुरपश्चिमको इन्चार्ज भए पनि कैलाली घटनाका अभियुक्त रेशम चौधरीलाई शपथ खुवाएर के गर्न खोजिएको हो भन्नेबारे केही नबुझेको बताए ।
उनले भने, ‘‘म सुदूर पश्चिमबाट प्रतिनिधित्व गर्ने नेता र सो क्षेत्रको इन्चार्ज समेत भएकाले मलाई त्यसबारेमा जानकारी हुनुपर्ने तर केही नै जानकारी भएन । सचिवालयका सदस्यहरुलाई पनि सोधें । उहाँहरुसँगपनि यसबारेमा कुरा भएको रहेनछ । त्यसैले किन यस्तो गरियो भनेर अचम्म लागेको छ ।’
रावलले यसअघि चौधरी जघन्य अपराधमा संलग्न रहेकाले उनलाई शपथ खुवाउन नहुने धारणा सार्वजनिक गर्दै आएका थिए । रावलले पछिल्लो घटनाक्रम स्मरण गर्दै भने,‘‘हालैको पार्टीको स्थायी कमिटीको बैठकमा महत्वपूर्ण निर्णय गर्दा पार्टीमा छलफल गरेर मात्रै गर्नुपर्ने कुरामा सहमति भएको थियो । तर अहिले अचानक यस्तो निर्णय गरिएकोमा अचम्म्ममा परेको छु । मैले यसबारेमा कुरै बुझेको छैन ।’’
चौधरीको शपथलाई लिएर सामाजिक सञ्जालमा सरकारको चर्को आलोचना गर्ने क्रम बिहीबारदेखि नै छ । बिहीबार अचानक डिल्लीबजारस्थित सदरखोर कारागारबाट प्रहरीको भ्यानमा सिंहदरबार लगिएका चौधरीलाई सांसदको शपथ ग्रहण गराएपछि फेरि सदरखोर जेलमै लगिएको छ । बिहीबार संघीय संसद सचिवालयमा सभामुख कृष्णबहादुर महराले उनलाई शपथ गराएका थिए ।