काठमाडौं माघ, २–
प्रहरीले एक फरार अभियुक्तमाथि गोली प्रहार गरी पक्राउ गरेको छ । प्रहरीले बर्दियामा हत्या आरोपी युवराज गिरीलाई गोली चलाएर पक्राउ गरेको हो ।
यसअघि पुस २६ मा बाँकेको कोहलपुरमा नेपाल प्रहरीको असई पदमा भर्ना हुन सुर्खेतबाट कोहलपुर पुगेका दीपकसिंह ठकुरीको विभत्स हत्या भएको थियो । प्रहरीले केहीदिन अघि घटनामा संलग्न भरत शाहीलाई सुर्खेतबाट पक्राउ गरेको थियो ।
शाही पक्राउ परे लगत्तै उनीबाट गिरीको संलग्नता खुलेपछि प्रहरीले उनको खोजीलाई तीब्र बनाएको थियो । त्यसक्रममा इलाका प्रहरी कार्यालय, कोहलपुरका डीएसपी रमेशबहादुर सिंह नेतृत्वको टोलीसँग उनको बर्दियामा जम्काभेट भएको थियो । प्रहरीले उनी भाग्न खोजेपछि गोली चलाएको हो जनाएको छ ।
प्रदेश ५ प्रहरी कार्यालयका प्रमुख डीआईजी पिताम्बर अधिकारीले उनको खुट्टामा गोली लागेको बताए । उनले पक्राउ गर्ने क्रममा उनले आक्रमक गतिविधि गरेपछि गोली चलाउने परेको जनाएका छन् । सामान्य अवस्थामा रहेका उनलाई उपचारका लागि कोहलपुर टिचिङ हस्पिटल पठाएको प्रहरीले जनाएको छ ।
